ખબરદાર ! મનસૂબાજી,
ખાંડાની ધારે ચડવું છે;
હિંમત હથિયાર બાંધી રે,
સત્ય લડાઇએ લડવું છે. – ખબરદાર ! મનસૂબાજી…
એક ઉમરાવને બાર પટાવત,
એક એક નીચે ત્રીસ ત્રીસ;
એક ધણીને એક ધણિયાણી એમ,
વિગતે સાતે ને વીશ;
સો સરદારે ગઢ ઘેર્યો રે,
તેને જીતી પાર પડવું છે.- ખબરદાર ! મનસૂબાજી…
પાંચ પ્યાદલ તારી પૂંઠે ફરે છે,
ને વળી કામ ને ક્રોધ;
લોભ, મોહ ને માયા, મમતા એવા,
જુલમી જોરાવર જોધ;
અતિ બલિષ્ઠ સવારી રે,
એ સાથે આખડવું છે. – ખબરદાર ! મનસૂબાજી…
પ્રેમપલાણ ધરી જ્ઞાનઘોડે ચડી,
સદ્ ગુરુ શબ્દ લગામ;
શીલ સંતોષ ને ક્ષમા ખડ્ ગ ધરી,
ભજન ભડાકે રામ;
ધર્મઢાલ ઝાલી રે,
નિર્ભે નિશાને ચઢવું છે. – ખબરદાર ! મનસૂબાજી…
સૂરત નૂરત ને ઇડા પિંગળા,
સુષુમણા ગંગાસ્નાન કીજે;
મન પવનથી ગગનમંડળ ચઢી, Z
’ધીરા’ સુરારસ પીજે, રાજ ઘણું રીઝે રે;
ભજન વડે ભડવું છે. – ખબરદાર ! મનસૂબાજી…
- ધીરો જીવન ઝાંખી
Good one.
આ પદ ભક્તકવિની ઉચ્ચ કવિત્વ શક્તિ અને શૈલીનું સ-રસ દર્શન કરાવે છે. આભાર.