રંગીલી હોળી- રમેશ પટેલ ‘આકાશદીપ’

મઢી કેસૂડે કેસરિયાળી ક્યારી
ખીલી છે મંજરી
વાગે છે બંસરી
ઘેલુડી ગોપી ને ઘેલો છૈયો
ફાગણનો વાયરો જ સૈયો
રંગમાં રમે આ ઋતુ રઢિયાળી
કુદરતનો વૈભવ
હૈયામાં શૈશવ
મસ્તીના ઉમંગમાં જાત ઝબોળી
આજ આવી છે રંગીલી હોળી
વાગ્યા આ ઢોલ ને ઝૂમતા પાદર
ગુલાલી ગીત
મનડાના મીત
વસંતના વાયરે વેરઝેર છોડી
આજ આવી છે રંગીલી હોળી
ફૂટતી મધુવાણી તીલક તાણી

હૈયે હરિયાળી
ભરી પીચકારી
કયા તે રંગમાં રંગાશો ગોરી
આજ આવી છે રંગીલી હોળી

રમેશ પટેલ ‘આકાશદીપ’

હિમ લહરમાં- રમેશ પટેલ ‘આકાશદીપ’

હિમ લહરમાં….
છંદ- શિખરિણી

અરે! છૂપાઈ ક્યાં, તમ પ્રખરતા, દેવ સવિતા
ધરા ઉષ્મા ખોળે, રવિ વિણ નભે, ખેદ પ્રસરે
કસોટી ભારે આ, ઋતુ બદલતી, નિત્ય ધરતી
સરે નીચે પારો, હિમ લહરમાં , કાય થથરે

છવાયા માર્ગો આ, બરફ ઢગલે, સ્તબ્ધ દુનિયા
હિમે છાયી પૃથ્વી, ધવલ પટને, વૃક્ષ ધવલાં
થયા કેદી સર્વે, વિદ્યુત રિસણે, પંગુ સરિખા
ઠરે ધીરે ધીરે, સરવર બધાં , પાક સઘળાં

પહાડો શ્વેતા આ, ઉપવન સમા, ધન્ય વસુધા
સમાધિસ્થે દીસે, પશુપતિ સમા ,આંખ ભરતા
વહેશે ધીરેથી, વિમલ જલ આ, સૂર્ય તપતાં
લહેરાશે વાડી, શત રૂપલડે’ ધૈર્ય ધરતાં

મહા શક્તિઓથી, ચતુર પ્રભુ તું , શ્રેય સજતો
ખુશી પામી હૈયે, ગગન ભરશું, ક્ષેમ ધરજો

રમેશ પટેલ ‘આકાશદીપ’

રાજા દીપોત્સવી તું…રમેશ પટેલ ‘આકાશદીપ’

છંદ-સુવદના

રાજા દીપોત્સવી તું, સબરસ મધુરાં, પ્રાગટ્ય દિવડે
રંગોળી આંગણેતો, તમસ વિજયશ્રી, આનંદ વરતે

મીટાવી શત્રુતાને , હરખ સભર હો, ચૈતન્ય સઘળું
ફોડી વ્યોમે ફટાકા, ઘર ઘર ટહુકે, ઝૂમે જ ગરવું

ધર્યા છે અન્નકૂટો, પ્રભુ ચરણ મહીં, છે ધન્ય ધરણી
આવો ભાવે પધારો, શુભ પથ જગ હો, ઉત્તમ કરણી

ભેટી દે સ્નેહ પૂંજી, જન જન હરખે, ઐશ્વર્ય ધરતો
ઝીલી હૈયે ઉજાશી, વિનય સભર આ, સંસાર ગરવો

રમેશ પટેલ ‘આકાશદીપ’

ગગન શરદનું…….રમેશ પટેલ ‘આકાશદીપ’

છંદ-સ્ત્રગ્ધરા

ધીરે ધીરે ઢળે રે, ગગન શરદનું, સાંજ લાગે સજીલી
ડોકાયો ચાંદ ગોરો, ધવલ રૂપલ એ, વ્હાલ ઢોળે ઉરેથી

શ્વેતાંગી પાવની એ, મનહર સરિતા, વૈભવી દર્શની એ
હૈયાં ઝીલે સુધાને, પરિમલ મધુરો, સ્નેહથી ભીંજવે રે

રેલાયે રેત પાટે, ગગન ઘટ અમી , ચાંદની રૂપેરી
ઊઠે જોમે લહેરો, જલધિ જલ રમે, વિંટતી સ્નેહ વેલી

વ્યોમે છાયી મજાની, ઋતુ શરદ ભલી, રાતડી પૂર્ણ રાણી
ઝૂમે વૃક્ષો રમંતાં, કુદરત હરખે, વાહરે આ ઉજાશી

શોભે તૃપ્તિ ભરીને, શરદ જન ઉરે, અમૃતાની કટોરી
કાલિન્દી રાસ લીલા, શરદ ઉજવણી, બંસરી કોણ ભૂલે?

રમેશ પટેલ ‘આકાશદીપ’

જય વિજયા દશમી- રમેશ પટેલ ‘આકાશદીપ’

જય વિજયા દશમી…મંગલ મુર્હૂત

આસુરી શક્તિઓનો વિધ્વંસ ને માનવીય સંસ્કૃતિનો જયઘોષ. ભારત ભોમની સરયુ નદીને તીરે અયોધ્યા નગરીમાં માતા કૌશલ્યા ને રઘુકુળના રાજન દશરથરાયના રાજકુળમાં ત્રિલોકનાથ લોકકલ્યાણ માટે અવતર્યા.

વિજયા દશમીએ..

આજે મારે ગાવું રામ નામનું ગાણું
મારે ગાવું રામ નામનું ગાણું…

રૂપ રૂપલીયો ચાંદલીયો હરખે,
અવધપૂરીને દ્વારે,
જનજન ઉરે ગુંજે આજે
થાશે યુગયુગનું અજવાળું.….મારે ગાવું રામ નામનું ગાણું

માત કૌશલ્યા દશરથ રાજન
અંતર સુખડાં માણે
ભારત ભોમના ભાગ્ય ખૂલ્યા
પામી ભવભવનું નગદ નાણું..….મારે ગાવું રામ નામનું ગાણું

દૈવ કૃપાએ ગગન ગાજે
સુંદર રામસીતાની જોડી
જનકપૂરીમાં મંગલ ઉત્સવ
ધરે આજ ધનુષ રામજી હાથું……મારે ગાવું રામ નામનું ગાણું

ધર્મ ધારક વીર ઉધ્ધારક
વનવાસીને વહાલા
વચન પાલક થયા પુરુષોત્તમ
કીધું રાજધર્મનું રખવાળું……..મારે ગાવું રામ નામનું ગાણું

ભક્તો કાજે વનમાં ભમી
આવ્યા માત શબરીને દ્વારે
લખણ હનુમંત વાનર સેના
હરખે રામસેતુએ સુગ્રીવ સુજાણું…..મારે ગાવું રામ નામનું ગાણું

ભૂલ્યો રાવણ છક્યો મદહોશે
શ્રી રામે કીધા ધનુષ ટંકારા
આસુરી વૃત્તિઓ સંહારી
દીધા વિભિષણને સ્વરાજુ
વિજયા દશમીનું આ મંગલ ટાણું …..મારે ગાવું રામ નામનું ગાણું

રામ તમારું નામ રોકડું નાણું
છે અમર પદ દાતા એ જાણું
મારે ગાવું રામ નામનું ગાણું.

-રમેશ પટેલ ‘આકાશદીપ’

વિશ્વ વંદ્ય ગાંધી….રમેશ પટેલ ‘આકાશદીપ’

અહિંસાના ઓ મંદમંદ પવન તું,
થઈ ઝંઝાવાત જગે રમ્યો
વીર ગુર્જર બાળ ગાંધી મહા,
માનવતાનો પૂજારી થઈ ધસ્યો

વિશ્વ વંદ્ય ગાંધી….રમેશ પટેલ(આકાશદીપ)
છંદ-શાલિની

મા ગુર્જરી, ધન્ય તું છે સુભાગી
તારા ખોળે, પ્રગટ્યો વિશ્વ ગાંધી

દ્રવે હૈયાં, દૈન્ય નિસ્તેજ લોકો
દેખી દુઃખી, ભારતીની ગુલામી

અંગ્રેજોની, યાતના ત્રાહિમામા
છેડી ક્રાન્તિ, રાહ તારી અહિંસા

જાગ્યું જોશે, શૌર્ય તારી જ હાકે
આઝાદીની, ચાહ રેલાય આભે

ગાંધી મારો, શાન્ત વંટોળ ઘૂમે
ગર્જે છોડો, જાવ છે દેશ મારો

ઝંઝાવાતો, દે દુહાઈ જ પૂઠે
તોડી બેડી, રાષ્ટ્રપિતા અમારા

હિંસા ભર્યું, વિશ્વ આજે રડે છે
સંતાણી છે, બંધુતા માનવીની

દીઠી ગાંધી, રાહ તારી જ સાચી
વિશ્વ વંદ્ય, ઓ વિભૂતિ મહા તું

-રમેશ પટેલ ‘આકાશદીપ’

ધન્ય છે મેઘ રાજા…રમેશ પટેલ ‘આકાશદીપ’

(છંદ-સ્ત્રગ્ધરા)

કાળાં ડીબાંગ ઘૂમે, રૂપ અવનવલાં, ગાજતાં ઘોર નાદે
છૂપાયો સૂર્ય ઓથે, પણ તન તતડે, બાફલો અંગ અંગે
પોકારે જીવ સર્વે, ધરણ ધખધખે , આવ દોડી પધારો
ધીરે ધીરે છવાયો, ગગન ગજવતો, મેઘલો વાયુ સંગે

ઝીલો દોડી હું આવ્યો, ફરફર ફરણે, ભીંજાજો ભાવ ભીંના
ખુશ્બુ છૂટી ઉરેથી, મિલન પરિમલે, વ્હાલ વેરે ધરામા
ઝીલે પુષ્પો રૂપોથી, તરબતર ધરા, સપ્ત રંગો સુહાણા
ઝૂમે વૃક્ષો લળીને, મન વન ટહુકે, ધન્ય છે મેઘ રાજા

ભવ્ય દીસે તટો એ, નયન મન હરે, લોકમાતા સુભાગી
તોડે એ ભેખડોને , નવયુવ સરખી, જોમથી જાય વેગે
ઝીલી આ વેગ હૈયું, ઝરણ સમ રમે, વાત માંડે મજાની
લાગે ભીંનાશ વ્હાલી, પુલકિત મનડે, ગીત કોઈ જ ગોતે

વર્ષા તારી કૃપાથી, કુદરત સજશે , વૈભવે દાન દેશે
મા મેઘાની ઉદારી, શત સુખ ઋતુઓ, ઝીલશું પાય લાગી

-રમેશ પટેલ ‘આકાશદીપ’

દે આ દેશ દુહાઈ…….રમેશ પટેલ ‘આકાશદીપ’

અન્ના તારી અમર કમાઈ, ધન ધન તવ સચ્ચાઈ
જીવ્યા જીવન જન સેવામાં, ખર્ચી સુખદ તપાઈ

ભ્રષ્ટાચાર કરે દુર્દશા , બહુ જ છકે ઠકુરાઈ
આવ્યો સાવજસો દિલ્હીમાં, દીધી વતન દુહાઈ

હથિયાર અહિંસાનું અમોઘ, છેડી ક્રાન્તિ લડાઈ
છે લડવી બીજી આઝાદી , જાગો દો ઉતરાઈ

ઉપવાસી અન્ના દે હાક , હો દૂર ભાગબટાઈ
માયાવી રાજ રમત હાલી, ધોખા ને ચતુરાઈ

રાષ્ટ્રનાયક તવ અન્નાગિરી, તોલે જગ શઠાઈ
તારી વાણી વચન કહાણી, દે આ દેશ દુહાઈ

ધન ધન અન્ના તારી કમાઈ (૨)

– રમેશ પટેલ ‘આકાશદીપ’

बरस रहे है रीमझीम अन्ना….रमेश पटेल ‘आकाशदीप ‘

बने पुकार जनताकी अन्ना
अब नहीं रुकेगी आंधी ।

भगाओ भ्रष्टाचार भारतसे
देंगे शक्ति हमें गांधी ॥

बरस रहे है रीमझीम अन्ना
भीगो भारतवासी ।

चलो दोस्तो मिलकर आगे
पाना है पावन उजासी ॥

हर प्रान्तसे आवाज उठी है
देशको लूंटने न देंगे।

हो भलाई जनताकी भैया
वह लक्ष्य लेकर जीयंगे॥

लोकतंत्र है गौरव अपना
है वंदेमातरम प्यारा ।

अहिंसा ही ताकात हमारी
दूर करेंगे अंधेरा

हो नित मधुर सवेरा (२) ॥

रमेश पटेल ‘आकाशदीप’

આઝાદી…રમેશ પટેલ ‘આકાશદીપ’

આઝાદીનો આંચલ ઓઢી પ્રગટ્યું નવલ પ્રભાત
હરખ સજીને ફરફર ફરકે ત્રિરંગી તાકાત
પાવન પર્વ પંદરમી ઑગષ્ટ ઉમંગી સરતાજ
જયહિંદ જયઘોષથી ગજવીએ લોકશાહીનાં રાજ
………………………………………………….

મળી આઝાદીને ,જનજન ઉરે આશ જનમી
ધન ધન અમે માત ગરવી,
હવે માને ખોળે, વતન સજવા જાત ધરવી

ધરા લીલુડી ને, ખળખળ વહેતાં પાક ઝરણાં
પળપળ દિલે હેત ભરતાં,
અમે ધાશું જોમે, જતન કરવા ભાવિ વરવાં

સજાવીશું માને, હર ચમન ફૂલે અમનથી
નવયુગે તને કોટિ કરથી,
દઈશું સન્માનો, વચન વટ હામે હરખથી

અમે તારા કાજે, વિકટ પથડે જંગ લડશું
ધવલ યશથી રંગ ભરશું,
ત્રિરંગા ઓ મારા, ફરફર દિલે લાડ કરશું

થઈ ગર્વી ગાશું, અમર લડવૈયા શુભ દિને
ગદ ગદ થઈ ભાવ ધરશું,
રૂડી આઝાદીનાં, મધુર ફળનાં ભાગ્ય રળશું

રમેશ પટેલ ‘આકાશદીપ’